|
By L.Amie
Eima yna leilô rah tawta chôla eima sai chah ta, zo awh-si, thlavaw pha ngasapa zy ata khidei tawta my no khai ngia ngasapa zy he hmo tyh pita, pavaw nata mathlaw a neipa hmozy hawpa chhao eima hmô tyh. chôla hmo eima hmôh tyhpa zydua khôla syulyu, eimo zy tlô thei khao leina ava rah liana cha, vamo serafim sahlao zy pahra awh ei tah, ama daihti nata no kheitama hma ei sala, ama y awh? khizaw chyhsa zy pahno thai rima awhpa cha vei. Ngiapatuzy ngiapana tah ama hmô tyhpa cha awh ta, cha cha khizaw thi-sô chalei thai leipa hro lynakipazy ropady awh ei ta,ngiapana ta hro thlalona cha ama hnei awh.
Chhaolei chô liata chyhsapa mai vaw pi chyu pi ta, a thi awhpa chhao eima cha chyu. Daihti hnei chyu pi ta, eima châta daihti ryhpaopa a y( biechhotupa 3:1-2). Thokha zy cha thyutlia hma leipa y awh ei ta, thokha zy deikua a macha hma leipa ama y awh. Chyhsa zydua nata ato chô liata ryureitupa cha PAW KHAZOPA chata, a ryhraona pahno thai awhpa ruh ngai tah kaw! A hyrai tah khizaw leilô a pahnie chyu pita, khizaw hmo ao-hraona chhao eima hnei chyu. Ada nata Ivy kha thothei ao-hraona liata hro pahleipa cha ei tah, kho ama chhi locho nota, Beipa bietaina lathlo cha ama tlei sai haw. Moleina cha Ada thei nie pahasana taw a thao ta, laisei lyma ta, kao nano reitia lei awhpa liata roreina su paryh lai lyma tah, thina lathlo he a cha. Thyutlia daihti pha no ta, chyhsapa liata ao-hraona (desire) he thatlô kaw awhta, thyutlia hlupi zyta ama viavi khei nga kaw tyh. Hmo eima kho kawpa zy, pachana nata sadu thliena zy vata molei ao-hraona kao liata hro viavi pitlo thla nawpa chi (hmo) khizaw liana he ta a hlu ngasa.Eima notato hro ngiabapa zy, pathipalo phaozie zy, sadu eima za thlie lai ngapa zy nata hmo eima hneibeisei nga tyhpa zy he, suh 10 (hraw) liata a su khazie tlaima, Beipa khozie lathlo haw lyma ta a cha va tly awh? tahpa za ropady cha tah, thyutlia hmisa pha chai daihti a hma ngapa saohlao hry lia a hlu via y awh ma pi tah thei ropa he a cha. Cha cha sata parao pakeichhie khai awhpata chyhsapazy a kho kawna daihti achapa vata chhao a cha thei awh. Chavana chata, Thyutlia lapa hlupi paritheipa sahma, drugs ao-hraona lia pao ei tah, kyhpachatu Beipa lathlô tleisai ei tah, chhazaw hrona hnei hma khaoleipa ta, he khizaw a khô saipa hlupi ama y awh.Thokha zy chhao cha O nata Abu-asai lia lôhratlô a chhuapa tah, khizaw pawngiana ngala sadu a thlie pa zy y hra awh ei tah, khizaw pawti chamai chichhipa he chikha ngala tah y tiarah awh vei.Chhôkha, Unaw, Opa lyuhri nata viasa lôhrei kyhpachana zy chhao suh hlupi liata a tih thei vei.Cha cha khohlei khona vata tlyma, nawna hro a vaw y leipa vata tlyma vaw cha thei tah, moleina vata a cha chai tyh. Krista kyhpacha hmeiseipa Mara thyutlia sahlao, khizaw khipi rona viapa liata a y nga haipa zy hlu kaw ba pi ta, khipipa liata hmothie eima hmo tyhpazy sai pata, he khizaw pawngiana lia pao n’awhpa hlupi y ta, molei reipasaona pyurei a paropa zy chhao eima thei tyh awh. Riavaina chota a sosi thai awhpa he a peimaw ngasa, thokha ama chuna lia hlaotlana hmô ei tah, raizy chhao ama hmô,hneirô kawhna tai a chuna vata hlaotlopa ama y thei awh. Krista hneina chôta hlaotlona he thlao a chhi ta, Krista china chôta cha a thaipa zy, a hneirôpa zy, mophana a topa zy he chyhsa nohlao hmeiseipa khizaw liata ama cha. Chahawna chata, daitih rypaopa hnei chyu pi ta,cha cha Bei Krista hmiapasa laina chôtah a chuna liata hlaotlona zy hneirôna zy, mophana zy hnabeiseina daihti phapa cha thyutlia no heta a za cha via rôh chai awh.
Atahma BANGALORE khipi liata Marapa saw a ypa zy pi thyutliapa cha chyu pi ta, huasua daihti a hma ngapa eima cha chyu. Khei hawpa tlyma hneibeiseina chôta hmotaopa eima hnei hra awh. Khipi liata a ypa eima chana hawta hmo hlupi a phapa nata a chhiepa a tyh awh pi ta, Kri-azypa eima chapa vata hmo eima tyhpazy he kao hlupi liata a sosi thai kaw awhpata a peimawpa a y awh (Ephesi Mozy 5:15,16,17). Kri-zyna raita a pahno leipa viasa tlyma, hmiepahno chhypa tlyma eima hnei awh. Chahawna hrata a chu lapa hlu via syulyu cha Krista thatih a pahno leipa cha awh ei ta, su thokha liana tala, pakha chhao Krizypa vaw y awh vei ei. Hneirô-dypha kaw hreisala ama zo kalu ha awh. Beipa Zisu hmotaotheina a pahnopa eima chapa vata hnabei a pa dyh thla awhpa cha ma pi, riahchhieh awhpa chhao cha ma pi, rairuna hlu kaw tyh hrasala Krista thatlôna lia a pahnie lai lymana chôta hmopha viapa eima tao hnyulô khiata, hmotaotheina zy taita hlaotlona a tohpa ma cha thei awh. Thyutlia daitih pha a hma ngapa cha rairi pi ta,eima thatlô-huasua daihti no tawta, hmophapa saina chah pahno awhpa he a peimaw ngai ta!Daihti a hneipa eima chapa vata, thatlô daihti y ta, thachha daitih a y hra. Kô 85 u theipa karaoti a kho kawpa he,ano liata karaoti ao-hraona cha pakha thei rima awhpa cha vei. Atai hama y tah hr’aw sila y zie hnei awh vei. Thina taita karaoti cha a do lyma thla ha awh. Chasala,ko 20-45 rachhôpa zy deikuala, achhuana hmeiseipa ama hnei khia, karaoti thlô-iana cha paha tah kaw hra ei sala, ama patleih thei awh. Daihti ryhpaopa hnei chyu pita,pa khô lyma thla ha lei pata, huasua no tawta hmophapa Beipa khona zie haw lyma tah daihti eima hma khia, hmopha pata mia zi lai lyma cheingei awh tah. Kô u thei daihti liata chhao theipha pathei awhta, Krista rah a kawh via lai lyma hra awh. Reipasaona rai2ta a tia thei leipa chhao ma cha hra awh. Thyutlia daihti a hma ngapa zy tana taozie pha leipa lia a tyhrei ei tah, hmopha leipa a tao tyh ei tahpa he, a palai pateina zy, a khotlana zy, thatlô kei atana zy a do leina chota nawtawna zy va cha thei ta, cha cha sona lapi cha hra vei. Thyutlia hlupi ta nawna hro a ra sai tyh pi ta, a reisina hro hnochhypa ta a y ha tyh. Chavata eima daihti nata no he hma chhei ha tyh pi ta,a pha leina liata ma pahie pathla lyma ha tyh. No-paw nata U thei viapa zy mo hmô a ryhna chôta daihti a hmatupa zy cha byhna to ei tah,ama pen-role chhao a pahniena tla a cha hmeisei. Sa-pa nata thlapa liata hro thatlôna byhna to hr’awhpata Beipa zana nata a reisina chôta Beipa hnota thlachhatupazy ao-rei cha chy ei tyhpa chata, he khizaw khosai ha taw chhao hnabeiseina rah-hropa y lai lyma tah, cha cha chhazaw hrona Beipa Zisu tah mia a chhuadyna pa he a cha.
Chyhsapa pahnona ta hmo hlupi hmôh papuapa y thei awh ta,a vaw yha chipa hmo reitia lei hmôh papua thei leipa a y hra, a y ngapa hmo chhao hlupi chyhsapa ta, ama hmô papua thei awh, reitialei pahno thei rima lei awhpa, a y nga thla py ly. a vaw y lai lyma awhpa chho chhi kheitama a cha awh tly? (Biephua 1:8) Hmo zydua chôh lia biehneitupa cha PAW KHAZOPA cha tah,hmotaotheinazy, rôhnanazy paki khai thei tupa cha PAW KHAZOPA a cha. Khizaw thaina nata sona raita a pha leipa cha tlo ta. Mo hlupi palôku chhapa tah sasapa ao-hraona liata a lai zaolaopa zy ama y thei awh.A hyrai eima chha n’awpa cha Beipa paly cha awhta, ABEIPA cha khizaw Bei kei atapa nata rôna-thatlô atapa zydua hla chhao rôna via syuly ta. Hmo zydua a taotupa cha tah, ryureitupa a cha Chyhsapa zy a thaona nata chha n’ awhpa liata ryureitu Beipa bie-ruh hnô a chhy thla awhpa cha ma pi. Eima châta daihti ryhpaopa y ta, pakhôh thla ha awhpa chhao cha ma pi. Bie kyhpchana hmeiseipa cha Krista pachhana bieru cha tlôtah, cha pachhana bie angiapana lia dei ngala ta hro thlalôna he a y, Khizaw hmo paw hawta a lo thla awhpa lia palo pahnie thla leipa ta, khapa y Beipa tah mia a kho? tahpa sai laina chôta, eima huasua daihti pha, a hma awhpa eima cha hmeisei. Mopathaipa zy hawta a charei hra tuhpa eima cha thei naw pata, khizaw pawti phana zydua hnô a chhy ngatupa cha chhao a byu hmeisei.
Mo Sa-hlupizy pachhana to hma khao vei ei, saiheina daihti ama chata y khao vei. Khizaw liana heta vaw kua khao hr’awh vei ei. Chyhsapa a hyrai, mapi-malai, machhie-mataw nata movy-mongyu pathluana a hnei ngai leipa PAW KHAZOPA cha ta daihti rypaopa he mia pie chyuta, cha no rypaopa cha pachhana to hma leipa ta, a pakho tuhpa eima cha hr’awh va ma! Pachhana thatih-pha eima thei haw. A theitupa eima cha. A papha sai thla awhpa cha ma pi. Daihti pha eima chata a vaw pahie lai nga no na heta, BEIPA ZISU mia ha thla hawta, BEIPA aw-na ao cha, “ama ula a vy ba tyh u; Nama hmotaopa zy cha keima khozie lyma hawta tao lyma ula! khizaw he ao-hrao leipa ula; tlaichhai hra kha u ! a vy u la mao cha paphyu awh v’ei na; Ei thyutlia kyh ei pachapa saohlao zy cha ei chita; nama hiapa chhao ei cha pie hr’aw ei”, tahpa ao-rei ropady laina chota, BEIPA chakaona lia tiama kaw pata a hmah via rili su vy! ( K.T.P duana no 10.6.2007 Bangaloe MCF pakhy sermon tawhta he message he rohpa a cha)
 |
Sermons 
Subscribe to this comment's feed